a b c d e f g h i j k l m n o p q r s t u v w x y z 0 1 2 3 4 5 6 7 8 9 #

letra de el far2 bena | الفرق بينا - dragon hell - دراجون هيل

[المقطع الأول]
مستغرب إنك مصدق نفسك وعايش دور المظلوم
مع إنك عارف إنك عاشق لخرق القانون
بتحب تستخبى جوة الفوضى
وشايف إنه ذنبي إنه عايش حياتي أرقى
كل تبريرك مغالطة، بأدن معاك في مالطا
عاوز تعيش في العفن عشان كسلان وبتطلب شفقة
بقيت عنصري عشان بنتقدك، بترمي اللوم على الثروة
مش خدتوا فرصتكوا وطلعتوا عملتوا ثورة
عيش حرية طالبتوا، كل العالم سمعكوا، نظام وقعتوا
ولسه بفقرك قاعد، يعني السياسة بريئة منكوا
لا مش هقول إنك خاين
هقول مغسول مخك عشان ما تتعلقش مشانق
عاوزها تمشي فوضى عشان الباشا متضايق
عطل طريق رئيسي عشان مع غبي زيك تتخانق
تتهمني بالتعالي عشان بقولك الحقايق
وجودكوا زي البنزين في بلدنا ولعتوا الحرايق
بجد قرفتونا (بجد قرفتونا)
تخلف إتناشر عيل وتقول آكليهم يا حكومة
أجيبلك الزتونة (أجيبلك الزتونة)
إنت قاصد تعمل كده عشان يبقالك حجة تطلب معونة
بالبلدي تشحت، وياريت شحات عادي ده إنت كمان عينك بجحة
لما تاخد الرشوة تبقى قدامي نيتك سمحة
ولما تشوفني أعمل حرام تقلبلي شيخ وماسك السبحة
إنت مالك وماله؟ (مالك وماله)
ربك عطاله خير ودفع التمن شقى بداله
حقدك خلاك تشوف الخير وتتمنى زواله
يطلع على لسانك في جملة تلاقي أمه جايبهاله
خسران وبرضه مصمم تخسر الرهان
ليه مش متقبل إن ربك خلقنا طبقات
دايمًا ناسب نجاحي إني وصلته بواسطات
قاعد تتفلسف كإنك متربي على إيد سقراط
لوم نفسك إنك ما كملتش كلامك
الدولة تعليمها مجاني بس كان فين إلتزامك
بتحط شماعتك إن الفقر هانك
طب عملت إيه في طفولتك غير إنك ولعت دخانك
ههه ماهو جيل ورا جيل بيسلم
ماهو إبنك هيشوفك ومنك هيتعلم
يطلع جيل أسوء من اللي قبله، حيوان متكلم
حتى الحيوان ممكن يتعلم لما يتألم
عمري ما كنت بحلم نبقى واحد ويحصل تلاحم
بس ليه دايمًا صورة الفقير في ذهني فاتح سلاحه
بدل ما يبصلي في مالي عاوز أشوف قصة كفاحه
بدل ما إنت قافل على نفسك صندوق ورامي مفتاحه
إرمي اللوم على الحكومة
إرمي اللوم على راس المال
إرمي اللوم على أي حد إلا نفسك، شغل عيال
إرمي اللوم على المحسوبية
إرمي اللوم على الإنسانية
إرمي اللوم على الماهية
وقولي دي ظروفي المادية
[اللازمة]
الفرق بينا
الفرق بينا
الفرق بينا
الفرق بينا

[المقطع الثاني]
خلاص خلصت؟
حاولت تنزل راسي في الأرض
حاولت تبيعني بتمن السيجارة الفرط
متخيل إني بكلامك السطحي إتأثرت
طموحي كان عالي ووقع على صخر الطمع إتكسرت
ديني مش فلوس زيكم، إعتبرني كفرت
إزاي تحاكمني في محكمتك وتحط لنفسك شرط
إنك الخصم والقاضي بعديها عليا حكمت
بتحلل الظروف على كيفك كإني إخترت
ديب جاي بتكلمني عن الوطن كإني شريك
نسيت التفريق بين اللبس الرخيص والشيك
تضم اللي شبهك حنبك وتقسم فريق
حطتني في سجن مخك اللي بانيه وعارف إني بريء
زي الشاهد الزور بتكدب وتصدق الكدبة
بتكلمني عن الرقي كإني نفسي أعيش في عشة
الطرق سهلة بتسدها بالشوك بتفرشها
مستكتر اللقمة في بقي قبل ما باكلها بتنتشها
أخويا إتعين ولا أخوك يا إبن الناس الواصلة
أيوة هقولك واسطة بينا هي النقطة الفاصلة
في الآخر أجري الأدنى وإنت تعلي الحد الأقصى
وجاي دلوقتي بعينك البجحة بترمي اللوم على الثورة
أيوة طالبنا بالحرية وبلقمة العيش
بس إنت لسه لابس حرير وأنا لسه لابس خيش
الفرق مش فلوس، الفرق بينا في كل شيء
إبنك في مارينا وإبني في سينا بيستشهد في الجيش
أنا فعلاً مخي مغسول بس بمياه المجاري
حتى اللقمة اللي بطفحها مرشوشة بالكيماوي
فشل كلوي وسرطان وبشقى كإني إنتحاري
الشقى عندنا إجباري، الشغل عندك إختياري
سبتني للجهل ياكلني وجاي دلوقتي تلومني
بتكلمني عن التقشف وتطلع على قنوات تقهرني
بطنك مليانة وجاي تقنعني وعلى الجوع بتصبرني
ولو طلبت بحقي يا بتحبسني يا تخوني
ليه شايفني نكرة ماليش قيمة إلا في الإنتخابات
مجلس الشعب فلوس وسلطة وزود في الفترات
بتسوقونا بشوية زيت وسكر إشتروا الأصوات
أصل اللقمة الواحدة بتفرق مع ناس عايشين أموات
الغلط فينا إحنا الإتنين مافيش كلام
لو أخدنا حق مش حقنا مافيش فيها إستثناء
بس الفرق لو سرقت بسرقها عشان أفضل عايش
إنت بتسرق الملايين عشان تزود اللي معاك
إبني المدينة وإعزل نفسك وإبني عليها أسوار
وريني على الشاشة حياة تانية بتجبلي إنبهار
حتى النظرة مستكترها قاعدلي بالمرصاد
لساني لو فكر يطلع بتحضروا المقصات
إرمي اللوم على الغلابة
إرمي اللوم على المحتاجين
إرمي اللوم على أي حد غير اللي بيسرقوا ملايين
إرمي اللوم على الحساد
إرمي اللوم على الحرمان
إرمي اللوم على الزكاة
وقول مش من حق الجعان
[اللازمة]
الفرق بينا
الفرق بينا
الفرق بينا

- dragon hell دراجون هيل

letras aleatórias

MAIS ACESSADOS